Ang BRP Ramon Alcaraz (PF16) ang kauna-unahang barko ng Hukbong Dagat ng Pilipinas na dumaan sa Panama Canal.

Mga Mandaragat at Mandirigma ng Hukbong Dagat

Ang mga mandaragat at mandirigma ng Hukbong Dagat ng Pilipinas ay nakaantabay 24 oras. Wala silang weekend, walang holiday. Anumang oras, may bagyo man, sakuna, kalamidad, kaguluhan o nasa gitna man ng kasiyahan, wala silang takot na sasabak sa kanilang misyon dahil ito’y kanilang sinumpaan. Mahal man nila ang kanilang pamilya, minsan pangalawang prayoridad lamang ito dahil mas nananaig sa kanila ang tawag ng katungkulan. Lagi silang umaalalay sa inyo sa panahon man ng kapayapaan, kaguluhan, kalamidad at kahit sa kasiyahan. Sa kakapiranggot nilang suweldo, buhay nila ang nakasalalay. Sumusuweldo man sila mula sa inyong mga binabayad na buwis, sinusuklian naman nila ito ng kanilang buhay. Naghahari sa kanilang puso ang paglilingkod sa mamamayan. Minsan iniuugnay sila sa katiwalian pero patuloy lamang silang nagseserbisyo para sa bayan. Anumang paninira ang ipukol sa kanila, di matitinag ang kanilang katapatan sa watawat at konstitusyon dahil ang kanilang dignidad ay hinubog ng panahon at makulay na tradisyong pinagtibay ng kanilang mahabang pagsasanay, paniniwala sa Diyos at ng pagtitiwala ng mga mamamayan. /Manny Fernando

Ikalawang High Endurance Cutter ng Pinas, Parating Na

Matapos ang higit isang taong pagsasakumpuni ng mga kasangkapan at mga superstructure ng Barko ng Repubika ng Pilipinas (BRP) Ramon Alcaraz (PF16) na dating USS Dallas, kasalukuyan na itong naglalayag patungo ng Pilipinas upang maging karagdagang barkong pandigma ng Philippine Navy ayon na rin sa modernisasyon ng Sandatahang Lakas ng Pilipinas.

"Halos isang daang opisyal at mga tauhan nito ang nagsanay sa US upang  mapagyaman ang kanilang kakayanan sa iba't-ibang navigational at war-fighting equipment ng barko," sabi ni Capt. Baldovino, commanding officer ng PF16.

Matatandaang dumating din sa Pilipinas noong 2011 ang BRP Gegorio Del Pilar (PF15) na kaparehong high endurance cutter class ng BRP Alcaraz (PF16). Ang dalawang barko ay ilan lamang sa mga naval assets na naaprubahang bilhin ng Pilipinas para sa modernisasyon ng ating Hukbong Dagat.