BRP Alcaraz nagsend-off sa San Diego

Magkahalong emosyon ang naramdaman ng mga tauhan ng BRP Ramon Alcaraz (PF16) habang kinakawayan sila ng mga Filipino-Americans sa isang send-off ceremony sa Pier 2 ng Naval Base San Diego, San Diego, California, USA umaga ng July 5, 2013.

Ang seremonya ay pinangunahan ni, Deputy Consul General Daniel R. Espiritu ng Philippine Consulate General’s Office na nakabase sa Los Angeles. “We are very happy na kahit papa’no we were able to acquire another vessel and this will be a big help to the modernization of our armed forces,” pahayag ni Espiritu  

“We, the Filipino communities especially here in San Diego, are very proud of the new ship of the Philippine Navy. We have around 200 thousand Filipinos here and a sizeable portion of that is in the US Navy,” dagdag pa niya.

Naging makapanindig balahibo rin ang send off nang pagtutugin sa PA system ng Naval base ang Pambansang awit ng Pilipinas habang nasa sea detail stations ang mga tauhan ng naturang barko. Ito ay hudyat ng paglisan ng barko sa pantalan  at bilang pagbibigay pugay sa ating bandila.

Makasaysayan ang paglagi ng BRP Alcaraz sa San Diego dahil sa pagbisita ng mismong asawa at mga anak ng yumaong Commodore Ramon Alcaraz  isang araw bago ang send off kung saan binigyan ng pagkilala ang kabayanihan ni Alcaraz.

Si Alcaraz ay naging commanding officer ng Q-boat noong WWII at itinuturing na bayani dahil sa pagpapabagsak nila sa tatlong eroplano ng Hapon. Kalaunan siya ay dinakip at ikinulong sa Malolos kung saan ipinamalas niya ang kanyang malasakit sa mga kapwa niya Prisoners of War (POW) nang hiranging siyang pinuno ng mga preso.

Matatandaang nanggaling ang naturang barko sa Charleston, South Carolina kung saan ito inayos at kinabitan ng makabagong equipment.  Doon rin nagsanay ng lampas isang taon ang buong crew ng PF16 sa mga navigational equipment, main propulsion, generator, at  iba’t-ibang kagamitan at systems ng barko.

Ang BRP Alcaraz ay maglalayag patungo ng Pilipinas ngunit magkakaroon ng port stop sa Hawaii at Guam.  Inaasahang darating sa Pilipinas ang barko sa unang lingo ng Agosto 2013.